Sangiza iyinkuru Inshuti zawe kuri :

Kubonera amacumbi abasura ubutaka butagatifu bwa Kibeho bikomeje kubera ihurizo ritoroshye akarere ka Nyaruguru


Yanditswe na     Ubwanditsi
15 August 2018 saa 07:11'

Abakristu Gatolika bo mu Rwanda ndetse n’abanyamahanga ntibasiba gukorera urugendo nyobokamana ku butaka butagatifu bwa Kibeho, bwamamaye ku Isi yose kubera amabonekerwa yahabereye yatangiye mu 1981.

By’umwihariko tariki ya 15 Kanama, ubwo Kiliziya Gatolika ihimbaza ijyanwa mu ijuru ry’umubyeyi Bikira Mariya (Asomusiyo), ni umunsi udasanzwe kuri Kibeho, aho imbaga y’abakristu bahakoranira bagahimbaza uwo mwari wanyuze Imana wahabonekeye abakobwa batatu mu bihe bitandukanye.

Nibura mu basaga ibihumbi 500 basura Kibeho buri mwaka, ku munsi w’ijyanwa mu ijuru rya Bikira Mariya gusa, hasurwa n’abasaga ibihumbi bitandatu.

Ubuyobozi bw’Akarere ka Nyaruguru kabarizwamo ubutaka butagatifu bwa Kibeho, buvuga ko bufite ihurizo ryo kubonera amacumbi abantu benshi babusura, by’umwihariko kuwa 15 Kanama, ubwo amahanga yose aba yahakoraniye.

Umuyobozi w’Akarere ka Nyaruguru Habitegeko François, kuri uyu wa Kabiri ubwo abantu benshi berekezaga i Kibeho yabwiye IGIHE ko bafite ikibazo cy’aho kubacumbikira.

Yagize ati ‘‘Dufite ikibazo gikomeye cyane cy’amacumbi i Kibeho, ubu abantu batangiye kuhagera ari benshi, nakubwira ko dufite ihurizo rikomeye ryo kubona aho kubaraza.’’

Yakomeje avuga ko akarere atari ko kazubaka amacumbi ku butaka butagatifu, ahubwo ari abashoramari bakwiye kuhabona nk’amahirwe akomeye y’ishoramari.

Ati ‘‘Ntabwo ari akarere kazubaka amacumbi hariya hantu niyo mpamvu ngira ngo namwe mudufashe duhamagarire abashoramari kuza kuhubaka amacumbi kandi ndabizeza ko nta gihombo bazagira.’’

Muri Kamena 2014, ubtaka butagatifu bwa Kibeho bwashyizwe n’Urwego rw’Igihugu rw’Imiyoborere mu mitungo kamere yirengagizwa n’aho iherereye mu turere tw’igihugu, mu gihe yakagombye kubyazwa umusaruro n’inzego z’ibanze ku bufatanye n’abikorera.

Hamaze kuba inama zitandukanye zihuza Leta na Kiliziya Gatolika, barebera hamwe uburyo i Kibeho hashyirwa ibikorwa remezo bibereye ba mukerarugendo. Ku ruhande rwa Leta, ikaba izatangira umushinga wo kubaka umuhanda Huye-Kibeho-Minini-Ngoma uzatangira kubakwa mu kwezi gutaha, ukazuzura nyuma y’imyaka itatu.

Bamwe mu bagiye gusengera i Kibeho basasa hasi bakaryama

Inkuru ya IGIHE.COM

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.