Dukurikire kumbuga Nkoranyambaga


Advertisement Banner

Imana yambwiye ko hari abayikorera ariko bakajya no gutera ibiraka kwa Satani-Ev Mama Charlene

Vincent Nsengiyumva , 1 month ago

Umuvugabutumwa Mukeshimana Emertha uzwi cyane nka Mama Charlene wamenyekanye cyane kubera inyigisho akunda gutanga zirimo amagambo adasanzwe akunze gukoreshwa cyane n’urubyiruko, yavuze uko Imana yigeze kumubwira ko hari abayikorera ariko bakaba bajya no gutera ibiraka kwa Satani.

Uyu mubyeyi usanzwe asengera mu itorero rya ADEPR Nyakabanda, ashimangira ko Imana ikunze kumuganiriza ikamuhishurira ibintu bitandukanye.

Maman Charlene yamenyekanye cyane mu minsi ishize ubwo yari yavuze amagambo akomeye ndetse anasekeje ubwo yarimo yigisha, ibintu byakwirakwijwe ku mbuga nkoranyambaga bamwe batangira kumwikoma bavuga ko yarengereye abandi bavuga ko ntacyo bitwaye.

Icyo gihe yari yakoresheje amagambo agira ati “Wa musore we, ni iki kigutera kurara wipfumbase wizinze nk’ipine ry’imodoka, n’abana bahiye bari i Kigali, n’abana bakeye, n’ibyuki n’ibyuma bihari, ukarara wenyine, kandi harimo n’ab’ubuntu…."

Maman Charlene avuga ko gukoresha imvugo zidasanzwe ari inzira ye yo gushaka ko n’urubyiruko rwisange mu byigishwa bye.

Mu kiganiro aheruka kugirana na Isimbi TV, Maman Charlene yavuze ko Imana imuganiriza mu buryo bunyuranye, yakohereza abahanuzi cyangwa bakivuganira.

Yavuze ko hari igihe Imana yamubwiye ko burya ngo hari abakozi bayo, bayikorera umunsi ku munsi ariko ugasanga hari n’igihe bajya gutera ibiraka kwa Satani. Yavuze ko kumenya ibi byatumye arushaho kumenya ko ababa ari mu nsengero atari ko bose baba bari kuri gahunda imwe.

Yagize ati “Imana yarambwiye iti hari abantu bankorera ariko bakajya no gutera ibiraka kwa Satani. Hari n’abakozi ba Satani ba nyabo bazwi baza gutera ibiraka mu nzu y’Imana. Njyewe ngira Imana inganiriza ikampa igisubizo cy’ikibazo cyose ngize mu mutima wanjye.”

Yasabye abakozi b’Imana gukorera Imana bakareka ibiraka byo kwa Satani kuko bishobora kuzababuza ingororano Imana yabateguriye.

Umuvugabutumwa Mukeshimana Emertha uzwi cyane nka Mama Charlene

Mama Charlene ni umuvugabutumwa umaze kumenyekana mu itorero rya ADEPR


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO