Dukurikire kumbuga Nkoranyambaga


Advertisement Banner

Abakirisitu barishuka ngo Yesu yarabapfiriye, Imana irapfa? Ipfuye se yankiza urupfu ite?-Pastor Mpyisi

Vincent Nsengiyumva , 3 weeks ago

Pasiteri Ezra Mpyisi, umukambwe w’imyaka 97 y’amavuko umaze imyaka ikabakaba 70 akora umurimo w’ivugabutumwa mu idini ry’Abadiventisite b’umunsi wa Karindwi, ashimangira ko Imana itigeze ipfa ko ahubwo abakirisitu bishuka ko yabapfiriye.

Pasiteri Mpyisi yabigarutseho mu kiganiro kirambuye yagiranye na Ukwezi TV aho yitsaga ku kugaragaza ko abakirisitu bayobejwe kuva kera, ndetse ko amadini n’amatorero atigeze yuzuza inshingano yagiriyeho gukora.

Uyu mukambwe utajya uca hirya no hino mu gihe agiye kunega umuntu cyangwa ikintu runaka, avuga ko inyigisho yahawe zari zuzuye ibinyoma bituma nawe abeshya abo yigishije.

Yagize ati “Baranyobeje nanjye ndayobya, barambeshye nanjye ndabeshya. Abamisiyoneri ntibaje bavuga ukuri baje mu nyungu zabo. Padiri yaje mu nyungu ze ntiyaje kuvugira Imana.”

Avuga ko igiteye agahinda ari uko amatorero n’amadini aharanira kugwiza abayoboke [ku bw’inyungu zayo] aho gukora icyo bahamagariwe cyo gutsindishiriza abantu icyaha.

Yavuze ko amajyambere yagezweho, gusa ngo kuri we ntacyo bimaze mu gihe badakora umurimo bahamagariwe gukora ku Isi.

Ati “Bafite amajyambere, bafite abantu benshi ariko ntabwo baratsinda icyaha. Barashaka kugera ku bwinshi gusa kandi Yesu ntabwo yazanywe n’ubwinshi bw’abantu ahubwo yazanwe n’insinzi y’icyaha.Iterambere bararifite ariko sizo nshingano zabo. Kubaka amashuri, amavuriro ni inshingano za Leta. Inshingano z’abanyamadini ni ukwigisha abantu gukora icyaha.”

Pasiteri Mpyisi ashimangira ko hari byinshi abakirisitu bibeshyaho bakagendera mu kigare bitewe n’uko babeshywe n’ababigishije bishakira inyungu zabo.

Aha yahise avuga ko ibyo bavuga ko Yesu yishwe, agapfira abantu ko ari ikinyoma, avuga ko ariko abantu bishuka.

Yagize ati “Barishuka ngo baranmwishe. Imana irapfa? None abakirisitu baravuga ngo Yesu yarabapfiriye. Umva aho mwayobeye. Ipfuye se yankiza urupfu ite? Rurayitwaye ukavuga ngo iragukiza urupfu kandi nawe rwamutwaye!”

Yabishimangiye avuga ko Imana ntawayigerereza ngo ayibambe kandi ariyo yamuremye. Aha avuga ko icyabambwe ari icyavutse, kuko icyavuye mu ijuru nta wari kugira ububasha wo kugihangara.

Ati “Imana ntiyigeze ibambwa. Ukabamba Imana! Iyo yaba ari Imana nyabaki ibambwa n’umuntu ariyo yamuremye? Yesu yagize kamere 2, ntabwo yajyaga kuba umukiza wacu atabanje kubyarwa n’umuntu wa kamere mbi. Icyavutse nicyo cyapfuye, icyavuye mu ijuru nticyapfuye.”

Umukambwe Ezra Mpyisi w’imyaka 97, ari mu bavugabutumwa bamaze imyaka myishi muri uyu muhamagaro. Ni umwe mu bapasiteri batangije umurimo wo kubwiriza ubutumwa mu itorero ry’Abadiventisite b’umunsi wa Karindwi. Pastor Myisi niwe mupasiteri mu Karere dutuyemo (Rwanda, Burundi na Repubulika Iharanira Demokarasi ya Congo) wabashije kubona impamyabumenyi ya Kaminuza muri Tewolojiya.

Pastor Ezra Mpyisi ntiyemeranya n’abavuga ko Yesu/Yesu yapfiriye abantu

REBA IKIGANIRO CYOSE NA PASTOR MPOYISI


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO