Dukurikire kumbuga Nkoranyambaga


Advertisement Banner

Uwari Burugumesitiri wishe nyina wa Padiri Ubald niwe basigaye bafatanya ibikorwa by’ivugabutumwa

Ubwanditsi , 4 months ago

Padiri Ubald Rugirangonga amaze kubera impano idasanzwe afite yo gusengera abarwayi bagakira ubumuga butandukanye n’indwara zikomeye ziba zarananiye abaganga b’inzobere. Uretse ibyo ariko, anazwiho kugira uruhare mu kwigisha abanyarwanda ubumwe n’ubwiyunge, ibintu akora yihereyeho kuko yabashije kubabarira abamwiciye umuryango muri Jenoside. Uwishe nyina wa Padiri Ubald aherutse gufungurwa agasanga Padiri Ubald yararihiriye amashuri abana be, none asigaye afatanya n’uyu mupadiri kwigisha.

Jenoside yakorewe abatutsi mu Rwanda mu mwaka w’1994, yabaye Padiri Ubald ari umupadiri muri Paruwasi ya Nyamasheke, n’ubwo nyuma yaje kwimurirwa muri Paruwasi ya Mushaka, ndetse nyuma anahabera Padiri mukuru kuva mu 1999.

Se yishwe mbere ya Jenoside yo mu 1994 azizwa ubwoko bwe, ndetse icyo gihe nibwo Padiri Ubald nawe yaje guhungira mu mahanga nyuma yo gutotezwa azira ubwoko, ariko akaza kugaruka mu Rwanda nyuma yo kumva ijwi ry’Imana rimusaba kuza kwigisha urukundo Abanyarwanda. Mu 1994 nyirizina, Jenoside yavukije Padiri Ubald nyina n’abandi benshi bo mu muryango we, nyamara abamwiciye yaje kubababarira, ndetse arihira amashuri abana babiri; umuhungu n’umukobwa b’abamwiciye umuryango muri Jenoside.

Mu kiganiro kirambuye Padiri Ubald yagiranye n’ikinyamakuru Ukwezi dukesha iyi nkuru yatangarije ko muri gahunda y’ivugabutumwa rigamije kwimakaza ubumwe n’ubwiyunge nyabwo asanzwe akora, ubu asigaye afatanya n’uwamwiciye umubyeyi muri Jenoside.

Padiri Ubald yari aherutse kudutangariza uko yababariye uwamwiciye umubyeyi akanarihirira abana be. Yagize ati: "Njye aho nageze, buri wese ni ishusho y’Imana imbere yanjye, n’uwishe mama naramubabariye, ndihirira amashuri abana be, aherutse no gufungurwa, yari Burugumesitiri, kuko yaburanye yemera icyaha baramufunguye. Umugore we yapfuye akiri muri gereza, abana be ndabarihira, afite umukobwa we wiga Medecine ni njyewe umurihira, mu minsi micye araba yabaye Dogiteri."

Padiri Ubald yabajijwe uko abanye n’uwo wamwiciye umubyeyi muri Jenoside nyuma yo gufungurwa, maze adutangariza ko ubu basigaye bafatanya kwigisha muri gahunda ye y’ivugabutumwa rigamije kwimakaza ubumwe n’ubwiyunge.

Padiri Ubald ati: "Ubu turafatanya kandi mbona bimurimo kuko aho mubwiye ngo amfashe hose araza, njyewe nigisha ibyo gutanga imbabazi hanyuma nawe akigisha ibyo gusaba imbabazi. Mbona we bimurimo, ikibazo ni benewabo mbona ko bamwanga, ntibishimira ko avugisha ukuri."

Padiri Ubald avuga ko bazanajyana aho bavuka i Nyamasheke vuba aha, bakajya kwigisha abakoze Jenoside n’abayirokotse bakabafasha kubohorwa imitima binyuze mu gusaba imbabazi kw’abayikoze ndetse no gutanga imbabazi ku ruhande rw’abayirokotse biciwe ababo.

Ibyo kujya i Nyamasheke ngo byatewe n’uko bamutumiye ngo azajye kwifatanya nabo muri Kanama uyu mwaka muri Yubile y’imyaka 75 Paruwasi yabo imaze, Padiri Ubald akabahakanira akababwira ko iyo Yubile ishingiye ku kinyoma adashobora kuyijyamo. Ati: "Nababwiye ko nzajyayo ariko ntagiye kwifatanya nabo ahubwo nkajya mu birori byabo ngasakuza nkavuga ko barimo kubeshya bakora ibirori byubakiye ku kinyoma, Padiri mukuru waho nawe yumva ndavuga ukuri, ubu rero tuzabanza tujyaneyo n’uwo nakubwiraga dufatanya kwigisha, nawe azajyayo anavugishe ukuri tunafashe abandi kubohoka bavuge ukuri"

Padili Ubald avuga ko hari na gahunda yari afite yo kuzajya hanze y’u Rwanda muri Kanama uyu mwaka ariko ngo ubwo bemeye ko azabanza gukorayo ivugabutumwa rigamije kwimakaza ubumwe n’ubwiyunge, ngo iyo gahunda yindi azayihorera ajye gufatanya nabo kwizihiza Yubile ariko ibe baramaze gusasa inzobe bakareka kubakira ku kinyoma.


Padili Ubald avuga ko asigaye afatanya gahunda ye y’ivugabutumwa rigamije kwimakaza ubumwe n’ubwiyunge n’uwari burugumesitiri yababariye nyuma yo kumwicira umubyeyi


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO