Sangiza iyinkuru Inshuti zawe kuri :

Ubucukumbuzi:Menya ibitera aba-Rasta gufata nyabingi nk’icyitegererezo


Yanditswe na     Ubwanditsi
22 August 2018 saa 11:43'

‘Nyabingi’ afatwa bitandukanye ndetse amateka ye akavugwa mu mico y’ibihugu bitandukanye byo mu Karere k’Ibiyaga Bigari, mu Rwanda azwi nk’umutunzi wasize araze benshi akabasaba kujya bamuterekera, aba-Rasta bo bamufata nk’uwaranzwe n’ubutwari akarwanya ubucakara byatumye bamufata nk’icyitegererezo.

Ibi ariko ntibikuraho ko Nyabingi ushobora no kumusanga mu mateka y’ibihugu bindi nka Repubulika Iharanira Demokarasi ya Congo, Tanzania ndetse na Uganda aho bivugwa ko yaje mu Rwanda aturutse. Ibi bisiga urujijo no kwibaza ku mateka ye n’ibyamuranze mu mibereho ye gusa hose afatwa nk’uwaranzwe n’ibikorwa byatumye amenyekana.

Mu kiganiro twagiranye n’abantu batandukanye mu gushaka ibisobanuro byimbitse, usanga mu mateka y’aba-Rasta afatwa bitandukanye n’uko Abanyarwanda bandi bamuzi.

Lion Imanzi yasobanuye uko Nyabingi afatwa mu myemerere y’aba-Rasta. Yavuze ko afatwa nk’uwaranzwe n’ubutwari bwo kurwanya ubucakara ndetse iyo migenzereze yamuranze igatuma agirana isano n’amateka yabo.

JPEG - 94.6 kb
Lion Manzi, umwe mu ba-Rasta bo mu Rwanda

Nubwo bimeze gutyo ariko yemeza ko aba-Rasta batamuramya ahubwo ibikorwa yakoze ari byo bituma afatwa nk’icyitegererezo kuko imyemerere yabo ahanini ishingiye cyane ku bikorwa bya Haile Selassie I [Ras Tafari Makonnen] wabaye Umwami w’Abami muri Ethiopia ndetse na Marcus Garvey wo muri Jamaica waharaniye uburenganzira bw’abirabura akanemera ko abajyanywe bunyago bagombaga gusubizwa muri Afurika.

Yagize ati “Intekerezo zose z’aba-Rasta zishingiye mbere na mbere kuri abo bagabo uko ari babiri, ibindi byose ni ukwishakisha nk’Abanyafurika.”

Lion Imanzi avuga ko ibijyanye no gufata Nyabingi nk’icyitegererezo ku ba-Rasta byavuye mu bushakashatsi bw’abirabura bajyanywe muri Jamaica bunyago mu ku kugerageza gusubira ku mizi yabo nk’Abanyafurika no kwishakamo amateka abarema agatima akanabaha akanyabugabo kurusha ayo bagiye bigishwa abagira abacakara gusa.

Ati “Nyabingi aba-Rasta bamuzi nk’umuntu ufatwa nk’intwari kuko amateka ye avuga ko yaba yaranze ubucakara ndetse akaburwanya bituma bakamufata nk’umuntu w’icyitegererezo. Gusa amateka ye avugwa biratandukanye.”

Yongeyeho ati “Ni uko rero hazamo bamwe baturutse cyane cyane mu bice bya Congo kuko nta wavuye mu Rwanda ajyanwa muri Amerika, niho bumvise amateka y’umwamikazi witwaga Nyabingi ariko twebwe hano tumwita Nyabyinshi, izina rigenda rihinduka bitewe n’aho avugwa.”

Yavuze ko kureba mu mateka ya Afurika y’ahantu hatandukanye abo birabura bari baraturutse byatumye bakora ubushakashatsi bashaka ubutwari bwaba bwarahagaragaye bashobora kwigiraho ngo bigarurire agaciro bambuwe akaba ari naho hava kubaha Nyabingi kuko yaranzwe n’ibikorwa bizirana no gutesha agaciro ikiremwamuntu.

Aba-Rasta ntibasenga cyangwa ngo bambaze Nyabingi

Lion Imanzi avuga ko nubwo Nyabingi afatwa nk’icyitegererezo mu ba-Rasta nta mihango runaka yo kuba bamuramya nk’uko mu madini bashobora kwiyambaza abatagatifu mu masengesho.

JPEG - 311.5 kb
Kuri iyi foto ni aba-Rasta barimo kuvuza ingoma, bizwi nka Nyabinghi

Yagize ati “Mu by’ukuri aba-Rasta bo ntabwo basenga Nyabingi ahubwo bamufata nk’umuntu wo mu mateka […] Ntabwo ari ikintu gitindwaho cyane kinazwi n’abantu benshi kubera ko atari cyo ubu-Rasta bushingiyeho. Ntihabeho kwitiranya ngo abantu bavuge ko aba-Rasta basenga Nyabingi. Oya.”

Yanavuze kuri ‘Nyabinghi rhythm’ ishingirwaho mu njyana ya Reggae, Ati “Aba-Rasta iyo bahuye bakaganira, bagasangira, bagasenga, bagasesengura iby’Imana n’iby’Isi habaho kuririmba bavuza ingoma. Uko kuvuza ingoma nabyo babyita Nyabinghi. Injyana ya Reggae uko igenda bishingiye ku buryo bavuza izo ngoma.”

Inyandiko zimwe zigaragaza ko hari n’itsinda rya Nyabinghi muri atandatu y’aba-Rasta, ibintu bamwe muri bo bamagana. Lion Imanzi avuga ko abantu bagira uko bagenda bafata ibintu mu buryo butandukanye akemeza ko nta kwicamo ibice kuba mu ba-Rasta.

Ati “Hari abagiye bashinga ngo amatsinda ya kirasta, ubundi nta matsinda abaho. Kuko uburasta atari idini, ni imyemerere gusa. Aba-Rasta ntibasenga Nyabingi.”

Lion Imanzi, umwe mu ba-Rasta bo mu Rwanda
Lion Imanzi yanakomoje ku muhanzi Bob Marley wibukwa buri wa 11 Gicurasi. Yavuze ko yibukwa na benshi yabereye icyitegererezo n’abo badahuje imyemerere ku bw’urukundo rw’amahoro, urw’ubutabera, urw’ubumwe n’urwo kurwanya ubusumbane byamuranze ndetse n’ubutumwa n’ubutumwa yatanze mu ndirimbo ze n’icyo bwamariye Isi.

Uko Nyabingi afatwa mu idini ry’abakirisitu

Padiri Rutinduka Laurent, umushakashatsi ku mateka y’u Rwanda n’aya Kiliziya Gatolika asobanura ko idini ry’abakirisitu ryavanyeho guterekera abakurambere hashingiwe ku kuba ari ubuyobe kuko bari abantu atari Imana.

Ati “Nyabingi yitwaga Nyabyinshi. Yadutse mu Rwanda ku Ngoma ya Ruganzu Ndoli mu kinyejana cya 16. Twibuke ko icyo gihe Nyabingi yaduka kimwe na Ryangombe u Rwanda rwari rumaze imyaka mu bihe bikomeye Ruganzu akaza atabaye.”

Yasobanuye ko ubwo Ruganzu yanaguraga u Rwanda “Abantu benshi bayobotse Ryangombe abandi bayoboka Nyabingi” wakomeje gukorera mu Ndorwa akahabera icyamamare “arasengwa, aturwa ibitambo by’inka, amapfizi n’intama, umuyoboke we akitwa umugirwa.”

Padiri Rutinduka yakomeje agira ati “Kumwiyambaza rero si byo, ni ukuyoba. Ibyo ni uguterekera abakurambere. Idini ry’abakirisitu ryabivanyeho kuko si Imana, ni umuntu. Ni umukobwa wa Cyamatare wanze gushakwa na Rulinda i Karagwe.”

Yasobanuye ko Nyabingi uwo yagize abayoboke benshi mu Majyaruguru y’u Rwanda, mu bice bya Byumba, Ruhengeri n’Umutara ariko bituruka mu Majyepfo ya Uganda. “Yabwiye Ruganzu ko atagomba gutera i Ndorwa kimwe n’uko yagombaga kubaha i Karagwe ntabatere barabihishe kwa nyirasenge Nyabunyana igihe u Rwanda rwari mu mage.”

Nyabingi afatwa ate mu mateka y’u Rwanda

Impuguke n’abashakashatsi mu bijyanye n’amateka bahuriza ku kuba Nyabingi yaraje mu Rwanda avuye muri Uganda agakomera akaba icyamamare kubera ubutunzi yagabiye benshi akabasaba kujya bamwambaza bakanamuterekera nyuma y’urupfu rwe.

Umwanditsi akaba n’umunyamateka, Nsanzabera Jean de Dieu, yabwiye IGIHE ko Nyabingi yari umunyamahanga waturukaga mu bihugu bya Uganda, mu Bufumbira.

Ati “Yaje mu Rwanda mu bihe bya ba Ruganzu Ndoli ari umutunzi w’ibintu byinshi ari nayo mpamvu yitwa Nyabyinshi. Yagiye gupfa ibintu bye abiha abantu benshi arabibaraga ariko arangije aravuga ati ‘Muzajye munterekera.’”

Nsanzabera avuga ko guterekera ari uburyo bwabagaho mu Rwanda rwo hambere bwo kwibuka Intwari z’Abakurambere babayeho mu muryango Nyarwanda ari naho yabasabye kujya bamuterekera bagakora imihango yo kumwibuka.

Yavuze ko Nyabingi atandukanye na Ryangombe kuko we yaje ari nk’icyezamana, agatangiza idini ry’Imandwa, bigaragaza ko kubandwa no guterekera bitahuraga kuko guterekera byari ukwibuka Intwari z’Abakurambere naho kubandwa bikaba ibintu bihurije abantu mu icyezamana.

JPEG - 215.8 kb
Bob Marley, Rasta ufite amateka Isi yose yibuka buri wa 11 Gicurasi

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.