Sangiza iyinkuru Inshuti zawe kuri :

Dr Rwaje Onesphore yahaye inkoni n’ububasha Musenyeri Laurent Mbanda anamwifuriza ishya n’ihirwe


Yanditswe na     Ubwanditsi
26 May 2018 saa 06:09'

Musenyeri Rwaje Onesphore wayoboraga Itorero ry’Abangilikani mu Rwanda (EAR) yahererekanyije ububasha na Musenyeri Laurent Mbanda umusimbuye kuri uyu mwanya, mu muhango wabaye kuri uyu wa Gatanu, tariki 25 Gicurasi 2018.

Ihererekanyabubasha hagati ya Musenyeri Rwaje ugiye mu kiruhuko cy’izabukuru na Musenyeri Mbanda, ryabereye ku Itorero rya EAR Kibagabaga; ryitabiriwe n’abasenyeri icyenda mu bayobora Diyosezi 11 zigize EAR, abashumba b’amaparuwasi yo muri Diyosezi ya Gasabo, abafatanyabikorwa b’itorero ndetse n’inshuti n’imiryango yabo.

Uyu muhango waranzwe no gushimira umushumba usoje inshingano ze no kwifuriza imirimo myiza Musenyeri Mbanda watowe n’Inama y’Abepiskopi ba Angilikani yateraniye i Kigali muri Mutarama 2018.

Musenyeri Rwaje Onesphore mu ijambo yagejeje ku bawitabiriye, yashimye Imana yamushoboje kuyobora neza.

Yagize ati “Nahawe inshingano ku wa 23 Mutarama 2011, none ngiye mu kiruhuko cy’izabukuru mu 2018. Muri iyi myaka Imana yadukoresheje iby’ubutwari birimo ibikorwa by’iterambere byubatswe nk’insengero, amashuri, amavuriro n’ibindi byinshi nkuko bigaragara mu gitabo cy’ibyakozwe nashyikirije Musenyeri Mbanda.”

Musenyeri Laurent Mbanda yatorewe kuyobora EAR asimbuye Musenyeri Onesphore Rwaje wimitswe mu 2011.

Musenyeri Mbanda Laurent usanzwe ari Umwepiskopi wa Diyosezi ya Shyira yashimye Rwaje avuga ko yamubereye icyitegererezo.

Yagize ati “Ndashima Imana ko uyu munsi wo gushyikirizwa abantu n’ibintu wagenze neza. Ndashima uyu mushumba nsimbuye ko yatubumbatiye, abumbatira itorero, adukomereza mu bumwe bwacu no mu bufatanye, yayoboranye ubugwaneza, ubwenge n’ubuhanga ndetse n’ubwitonzi.”


Musenyeri Laurent Mbanda yavukiye mu Rwanda ku wa 25 Ukwakira 1954

Musenyeri Mbanda yatanze icyizere ko azakomeza mu murongo wo kubaka itorero. Ati “Mwijeje ko aho yaragejeje ikivi nanjye ariho nzakomereza kandi niba yagendaga atera intambwe ndende mu iterambere ry’itorero mbijeje ko nziruka ariko tukaguma mu cyerekezo cyo guteza abanyetorero n’Abanyarwanda imbere. Ndabizeza ko tuzabigiraho kuko nkunda cyane umurimo ngakora nshyizeho imbaraga n’ubwitange, bityo byose Imana izabinshoboza mfatanyije n’aba bashumba bose dusanzwe dukorana ndetse n’abafatanyabikorwa.”

EAR imaze kuyoborwa n’Abepisikopi bakuru batatu aribo Musenyeri Augustin Nshamihigo, Musenyeri Emmanuel Mbona Kolini na Musenyeri Rwaje Onesphore wasimbuwe na Musenyeri Laurent Mbanda.

Musenyeri Laurent Mbanda watowe nk’Umwepisikopi wa kane azahabwa inkoni y’ubushumba yo gutangira kuyobora EAR kuva ku wa 10 Kamena 2018, umunsi uzahurirana n’ibirori byo gusezera ku mugaragaro Musenyeri Rwaje Onesphore bizabera ku Gisozi kuri Stade ya ULK.

Amabwiriza ya EAR agena ko Umwepisikopi uyobora Itorero ku rwego rw’Igihugu anahabwa kuyobora Diyosezi ya Gasabo.

Musenyeri Mbanda yatanze inkoni y’ubushumba bwo kuyobora EAR Diyosezi ya Shyira muri Werurwe umwaka ushize, asimburwa na Mugiraneza Samuel. Mbanda yavukiye mu Rwanda ku wa 25 Ukwakira 1954. Yaje guhunga akiri muto ahungana n’ababyeyi be bajya mu Burundi ari ho yigiye amashuri abanza n’ayisumbuye. Arubatse afite umugore n’abana batatu.

EAR yageze mu Rwanda mu 1922. Iri torero rigizwe na Diyosezi 11, Paruwasi 406, Amakanisa 2331. Apasiteri bari mu mirimo ni 460 hamwe n’abarimu 2331, mu gihe abakirisitu barenga miliyoni.

Umuhango w’ihererekanyabubasha witabiriwe n’abantu b’ingeri zitandukanye

Musenyeri Rwaje Onesphore (iburyo) yahererekanyije ububasha na Musenyeri Laurent Mbanda


Musenyeri Rwaje Onesphore (iburyo) ahererekanya ibitabo birimo ibikorwa bya EAR na Musenyeri Laurent Mbanda wamusimbuye


Musenyeri Rwaje Onesphore ugiye mu kiruhuko cy’izabukuru yari yimikiwe kuyobora EAR mu 2011





Abafatanyabikorwa ba EAR na bo bari bahari


Musenyeri Laurent Mbanda yatanze icyizere ko azakomeza mu murongo wo kubaka itorero


Nyuma y’umuhango wo guhererekanya ububasha, hafashwe ifoto y’urwibutso

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.