Dukurikire kumbuga Nkoranyambaga


Advertisement Banner

Yezu yavukiye i Betelehemu hano havukira u Rwanda- Guverineri Gatabazi avuga ku Murindi

Ubwanditsi , 1 month ago

Guverineri w’Intara y’Amajyaruguru, Gatabazi Jean Marie Vianney, yasabye urubyiruko kwiga no gusobanukirwa amateka ku Murindi w’Intwari hafite mu kubohora u Rwanda, bakayabwira n’abatayazi nk’uko abanyamadini bamamaza i Betelehemu nk’ubutaka butagatifu, Yezu Kiristu yavukiyeho.

Ubu butumwa yabutangiye mu Karere ka Gicumbi kuri uyu wa 28 Kamena, ahari hateraniye urubyiruko rusaga 200 rwo muri ako Karere n’ijana rwaturutse i Kigali.

Rwari mu gikorwa cyateguwe muri gahunda yo kwizihiza ku nshuro ya 25, Ukwibohora, hagamijwe kurusobanurira amateka y’u Rwanda yarugejeje kuri jenoside yakorewe abatutsi, urugamba rwo kubohora igihugu no guhagarika jenoside.

Uru rubyiruko n’abayobozi barimo Minisitiri w’urubyiruko, Rosemary Mbabazi, abayobozi mu Ntara y’Amajyaruguru, abahagarariye ingabo n’abandi babanje gusura indake Perezida Kagame yatangiragamo amabwiriza mu rugamba rwo kubohora igihugu rwatangiye mu 1990.

Iyi ndake iherereye mu Murenge wa Kaniga mu Kagali ka Murindi, aho nyuma y’uko ingazo zari iza RPA zihafashe zahashyize ibirindiro bikuru bya FPR Inkotanyi. Ubu niho hari Ingoro ndangamateka y’urugamba rwo kubohora igihugu.

Mu kiganiro yahaye uru rubyiruko, Guverineri Gatabazi yarusabye gusura iyo ngoro, rugasobanurirwa amateka ibitse ndetse rukayamamaza nk’uko Abanyamadini bamamaza ubutaka butagatifu Yezu yavukiyeho.

Ati “Ntacyo mpfa n’amadini, hari abantu babyuka mu gitondo bati ‘Yezu yavukiye i Yeruzalemu, i Beterehemu, muri Yudeya n’ahandi. Hano naho havukiye u Rwanda muhamenye. I Nazalete sindagerayo, i Yeruzalemu sindagerayo, nshobora kuhasobanura nk’uwagezeho ariko nifuza ko urubyiruko muzajya musobanura ku Murindi.”

Guverineri Gatabazi yavuze ko nyuma yo kubwirwa amateka yo ku Murindi w’Intwari, urubyiruko rwahasuye rukwiye kuyazirikana ndetse rukayamamaza ku batayazi n’abatarahagera.

Ati “Mumenye nk’urubyiruko uruhare hagize mu kubohora iki gihugu, iyo niyo vanjiri yanyu nk’abanyarwanda, ni nayo muzabwira abandi. Twebwe kurabibabwira nk’ababibonye, turabivuga nk’ababihagazeho, mwebwe muzabivuga nk’ababibwiwe ariko kubibwirwa neza ni ukuzabibwirwa muri hano.”

Guverineri Gatabazi yanarusabye ko nyuma yo kuhasura rukwiye kuhakura ikimenyetso ruzajya rwereka abandi batarahagera kugira ngo bahamenye cyangwa bagire amatsiko yo kuhagera.

Ati “Mukazajya muhava mugataha, washaka utahane n’itaka, utware n’ibuye nawe ubijyanye utahe uvuga uti ‘Mvuye ku Murindi, mvanyeyo ikimenyetso cy’aho ugukizwa no gutsinda k’u Rwanda bikomoka.”

Gusa yababwiye ko bidakwiye gukorwa nk’ikimenyetso gusa ahubwo bagomba gusigasira no gukomeza ibyifuzo abatangije rugamba rwo kubohora u Rwanda bari bafite byo kubaka ubumwe bw’abanyarwanda no gushyiraho igihugu buri munyarwanda yibonamo kandi umuyobozi akabazwa ibyo ashinzwe.

Guverineri Gatabazi yanavuze ko urubyiruko rwitanze kugira ngo rubohore igihugu kandi rukabigeraho, urw’ubu narwo rukwiye kugira ukwitanga kugira ngo ibyo rwifuza rubigereho.

Ibyo ngo kugira ngo rubigereho bisaba guhera kuri bike rufite rukagera kuri byinshi, rukagira ikinyabupfura, ukwitanga no kugira icyerekezo.

Ku Murindi ni ho haberaga inama zafatirwagamo imyanzuro yo kubohora igihugu, ni ho bakiriraga abashyitsi babaga baje gusura ingabo za FPR Inkotanyi, akaba ari na cyo gicumbi gikuru cyo kubohoza u Rwanda.

Ubwo Perezida Paul Kagame yari amaze gushyira ibuye ry’ifatizo ahagombaga kubakwa ingoro y’umurage wo kubohoza igihugu, yavuze ko buri kintu cyose kigira aho gikomoka.

Ati “Igiti kirakura kikaba kinini nyamara kiba cyaravuye ku rubuto rutoya, rimwe na rimwe udashobora no kubonesha ijisho. Iyi ngoro igiye kubakwa hano izajya itwibutsa urugendo twagendanye n’abanyagicumbi, bikaza no kugera ku Banyarwanda bose. Ibyabereye hano ku Murindi byagejeje u Rwanda ku mateka akomeye tukigenderaho n’ubu n’ubwo urugendo rukiri rurerure.”


Guverineri Gatabazi yasabye urubyiruko gushishikarira kumenya amateka yo kubohora igihugu

Abayobozi bari bitabiriye ibi biganiro


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO