Dukurikire kumbuga Nkoranyambaga


Advertisement Banner

USA: Itorero ry’aba-méthodiste rigiye gucikamo ibice kubera gushyingira abahuje ibitsina

Akayezu Jean de Dieu , 3 weeks ago

Abayoboke b’itorero ry’aba-méthodiste bo muri Leta Zunze Ubumwe za Amerika, batangaje umugambi wo gutandukana kubera kutumvikana ku kibazo cyo gushyingira abaryamana bahuje ibitsina.

Abayoboke b’iri torero bafata uyu mugambi nk’igisubizo kirambye ku makimbirane amaze igihe muri iri torero, kandi biteguye kuwemeza bidasubirwaho muri Gicurasi uyu mwaka, nk’uko byemejwe kuri uyu wa Gatanu.

Iri torero ryigaruriye abayoboke hafi miliyoni 13 ku isi hose, ni irya kabiri rifite abayoboke benshi mu madini ya giporotesitanti muri Leta Zunze Ubumwe za Amerika.

Uyu mugambi wo gutandukana niwemezwa bidasubirwaho, hazavuka ibice bibiri muri iri torero, aho abadashyigikiye ishyingirwa ry’abaryamana bahuje ibitsina bazarema itorero ryabo rishya; naho abashyigikiye iryo shyingirwa bagakomeza igice cyabo cyigenga, kandi bagaha amasakamentu abo baryamana bahuje ibitsina.

Muri Gashyantare 2019, mu nama rusange y’itorero ry’aba-méthodiste yabereye ahitwa Saint Louis, muri Leta ya Missouri, haganiriwe mu buryo bwihariye ku bijyanye n’imibonano mpuzabitsina ndetse n’ubumwe bw’itorero.

Icyo gihe hanabaye amatora aho 53% by’abari bahagarariye abandi, batoye bamagana ishyingirwa ry’abaryamana bahuje imiterere y’umubiri.

Nyuma yo kutumvikana kuri iyo ngingo, abagize inama nyobozi y’itorero banzuye ko gutandukana ari bwo buryo bwiza bwo guhosha uko kutumvikana, mu rwego rwo guha uburenganzira buri ruhande rugakomeza imyizerere yarwo.

Muri Gicurasi 2020, nibwo hateganyijwe inama rusange izemeza bidasubirwaho uwo mushinga wo gutandukana, ikazabera mu mujyi wa Minneapolis.

Umuyobozi w’abashyigikiye gushyingira abaryamana bahuje imiterere y’umubiri muri iri torero, Thomas Berlin, yavuze ko anejejwe cyane n’iki cyemezo kuko itorero ry’aba-méthodiste ryabonye uburyo buzana igisubizo ku makimbirane yari amaze igihe.

Uku gutandukana nikuramuka kugezweho, uruhande rw’abadashyigikiye gushyingira abaryamana bahuje imiterere y’umubiri ruzahabwa miliyoni 25 z’amadolari ya Amerika.


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO