Sangiza iyinkuru Inshuti zawe kuri :

Umuririmbyi wa Chorale de Kigali yakoreye Rayon Sports indirimbo idasanzwe


Yanditswe na     Ubwanditsi
8 June 2018 saa 07:24'

Umuririmbyi wa Chorale de Kigali akaba n’umuhanzi, Nizeyimana Nyituriki Denys, yakoreye Rayon Sports, indirimbo yanditse mu buryo bwa gihanga, igataka ibigwi iyi kipe ikundwa n’Abanyarwanda benshi ndetse ikanayifuriza gukomeza kuba indatwa yandika amateka mu gihugu no mu mahanga.

Nizeyimana umaze imyaka itatu aririmba muri Chorale de Kigali, ni umufana w’akadasohoka wa Rayon Sports. Avuga ko igitekerezo cyo kuyikorera indirimbo iri ku rwego mpuzamahanga yakigize ubwo yajyaga gukina muri Afurika y’Epfo na Mamelodi Sundowns, mu marushanwa ya CAF Confederation Cup.


Umuririmbyi wa Chorale de Kigali akaba n’umuhanzi, Nizeyimana Nyituriki Denys

Mu kiganiro yagiranye na IGIHE yagize ati “Njye nsanzwe ndi umufana wa Rayon Sports, ubwo yari igiye gukina muri Afurika y’Epfo ikanakomeza kwitwara neza ku rwego rwa Afurika, naratekereje nsanga igira indirimbo zisanzwe ariko ntayikoze mu buryo bw’amanota ku buryo n’iyo wayiha abazungu bayicuranga. Mbese indirimbo wavuga ko ari ikirango ‘Hymne’ cya Rayon Sports”.

Yakomeje agira ati “Nibwo nafashe umwanya ndayandika, nsaba Chorale ya Saint Paul iririmbira kuri Paruwasi Gatolika ya Kicukiro, inyungura ibitekerezo ndetse ni nayo yayiririmbye.”

Nizeyimana yatangaje ko Chorale de Kigali atari yo yaririmbye nk’uko benshi babikeka. Yifuza ko abafana ba Rayon Sports bayimenya, ikaba indirimbo yayo izwi nk’uko n’amakipe yo hanze aba afite indirimbo ziyaranga kandi ziririmbye mu buryo bwa gihanga.

Icyo yifuza kuri Rayon Sports


Ikipe ya Rayon Sport yahimbiwe indirimbo nshya n’umuririmbyi wa korali de Kigali

Umusogongero w’iyi ndirimbo wasakaye kuri uyu wa Kane. Nizeyimana avuga ko yagiye hanze itararangira uko abyifuza kuko ashaka no kuyikorera amashusho meza. Asaba ubuyobozi bwa Rayon Sports kumufasha ikazasohoka burundu imeze neza, itera ishema buri mufana.

Ati “Ubundi indirimbo mwumvise ntabwo irarangira, hari ibindi nifuza kuyikoraho muri studio nkanayikorera amashusho meza. Birumvikana nk’ubuyobozi bwa Rayon Sports bumfashije, yazaba nziza kandi n’abafana bakayikunda kuko yifuriza ikipe amahirwe.”

Amwe mu magambo ari muri iyi ndirimbo agira ati "Hano iwacu hari amakipe meza azi gukina. Yakina yagira hari iyahiga yose, nta yindi ni Rayon sports! Izo si impaka ni ibigaragara. Ihorana ishyaka n’ubudahangarwa. Mudatenguha abafana bawe, gahore ku isonga."

Mu nyikirizo agira ati “Rayon Sports FC tsinda, gwiza ibikombe, tsinda amakipe y’amahanga n’ay’inaha mu Rwanda. Oh Rayon, Gikundiro, dukunda gwiza ibigwi hose ku Isi, Ramba imyaka myinshi natwe abafana bawe twese turagushyigikiye."

Naho mu gitero cya nyuma igira iti "Rayon mu kibuga usanga andi makipe ayitinya, irayazenguruka ikayatsinda yose ikazamura ibikombe. Ibyo bituma tutazayivaho n’ubuvivi bwacu buzayishyigikira. Mudatenguha abakunzi bawe gahore ku isonga."

Ubusanzwe iyi kipe ni imwe mu zaririmbiwe indirimbo nyinshi mu Rwanda harimo izamamaye nka Bakunda Rayon ya Byumvuhore, Oh Rayon ya Rusakara, Rayon Sports yacu yaririmbwe n’itsinda ry’Ingangare, Abarayon ya Senderi n’izindi nka Mbabarira, ariko zose nta n’imwe yari iririmbye mu buryo bw’amanota.

UMVA IYI NDIRIMBO HANO:

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.