Sangiza iyinkuru Inshuti zawe kuri :

RDC: Imyigaragambyo ya Kiliziya Gatulika yahitanye babiri, benshi barakomereka


Yanditswe na     Ubwanditsi
26 February 2018 saa 02:37'

Ejo ku cyumweru tariki ya 25 Gashyantare 2018, muri Repubulika iharanira Demokararsi ya Congo, abantu babiri bapfuye abandi benshi barakomereka, igihe abayoboke ba Kiliziya Gatolika bongeraga gutana mu mitwe n’inzego z’umutekano mu myigaragambyo bakora bamagana Perezida Joseph Kabila.

Padiri Jean Claude Tabu wa Paruwase ya Saint-Benoît, yavuze ko nyuma ya misa ya saa tatu, abapolisi n’abasirikare bahise baza hafi ya kiliziya bagatangira gutera imyuka iryana mu maso no kurasa, ibintu avuga ko bigoye kubona uko abisobanura.

Itangazo ryashyizwe ahagaragara n’Umuryango w’Abibumbye, rigaragaza ko umuntu umwe yarasiwe na Polisi i Kinshasa, undi akagwa ahitwa Mbandaka. Ni mu gihe abagera kuri 47 bakomeretse n’aho abasaga 100 bagatabwa muri yombi.

Mu butumwa bwanyuze kuri Televiziyo y’Igihugu, RTNC, Umuvugizi wa Polisi, Col. Pierrot-Rombaut Mwanamputu yatangaje ko nta muntu n’umwe wapfuye, ndetse mu gihugu hose abakomeretse ari 22 barimo abapolisi 13, mu gihe abagera ku munani batawe muri yombi.

Ibiro Ntaramakuru by’Abafaransa, AFP byatangaje ko mu masaha y’umugoroba iyi myigaragambyo yari yamaze guhagarikwa. Minisitiri w’Intebe, Bruno Tshibala akaba yaragaragaye mu mihanda ya Kinshasa agenda ahereza abaturage inoti z’amadolari 100 ya Amerika.

Ni ku nshuro ya gatatu mu mezi abiri gusa, abakirisitu bo muri Kiliziya Gatolika bateguye imyigaragarambyo yamagana Kabila warangije manda ye ya nyuma mu mpera za 2016, akaba akiri ku butegetsi kubera ko umusimbura ataratorwa. Imaze kugwamo abasaga 10.

Abigaragambya bifuza ko Perezida Kabila yemera ko adateganya kuzongera kwiyamamaza mu matora ateganyijwe ku wa 23 Ukuboza 2018.

Kiliziya Gatolika iri imbere mu batifuza kumva Kabila avuga ko azongera akiyamamaza

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.