Dukurikire kumbuga Nkoranyambaga


Advertisement Banner

Padiri Safi wigishije benshi mu bapadiri ba Arikidiyosezi ya Kigali yitabye Imana

Ubwanditsi , 5 months ago

Padiri Safi Protais wakoreraga umurimo w’Imana muri Paruwasi ya Kacyiru, Arikidiyosezi ya Kigali yitabye Imana azize urupfu rutunguranye.

Safi w’imyaka 71 yitabye Imana kuri uyu wa Gatandatu mu gitondo nkuko itangazo ryasohowe na Arikiyepiskopi wa Kigali, Musenyeri Antoine Kambanda ribigaragaza. Nta burwayi buzwi yari asanzwe afite.

Uyu mupadiri yari amaze igihe kinini mu murimo wo kwiha Imana kuko yahawe ubupadiri tariki 21 Nyakanga 1974.

Yakoreye umurimo we mu maparuwasi ya Nyamirambo na Rutongo nyuma ajya kwigisha abazaba abapadiri mu Iseminari nkuru ya Nyakibanda.

Aho yahamaze imyaka isaga 25 yigisha ibyerekeranye n’inyigisho nyobobokamana mu by’ikenurabushyo (Théologie pastorale), Gatigisimu n’ikigereki.

Ikinyamakuru Kinyamateka kivuga ko mu bapadiri basaga ijana bakorera umurimo w’Imana muri Arikidiyosezi ya Kigali, nibura bitatu bya kane baciye imbere ya Safi mu iseminari ya Nyakibanda.

Ubwo yari akiri umwarimu muri iyo seminari, azwiho kuba yarakundaga kujyana n’abaseminari muri siporo agakina umupira w’amaguru.

Padiri Safi Protais yavutse ku wa 4 Ukuboza 1948 abatizwa ku wa 12 Ukuboza 1948. Yahawe ubusaserdoti afite imyaka 26 ku wa 21 Nyakanga 1974, aba umupadiri wa 246.

Ababanye na Padiri Safi bahamya ko yari umupadiri wicisha bugufi cyane, akakira bose. Ntabwo yajyaga yizirika ku bintu.

Misa yo guherekeza Padiri Safi izaba ku wa Gatatu tariki 01 Gicurasi guhera i saa tanu muri Kiliziya ya Paruwasi Regina Pacis i Remera. Imihango yo kumushyingura izabera i Ndera saa munani mu irimbi rya diyosezi.

Mu bapadiri basaga ijana bakorera umurimo w’Imana muri Arkidiyosezi ya Kigali, nibura bitatu bya kane baciye imbere ya Safi mu iseminari ya Nyakibanda


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO