Dukurikire kumbuga Nkoranyambaga


Advertisement Banner

Ndandambara yadutera ubwoba n’ubu Imana izaturinda- Archbishop Dr Mbanda

Editorial , 1 week ago

Umushumba Mukuru w’Itorero ry’Abangilikani mu Rwanda, Archbishop Dr Mbanda Laurent yavuze ko u Rwanda rwanyuze muri byinshi bikomeye ari nayo mpamvu abanyarwanda bakwiye kwibuka ko ya Mana yabatabaye cya gihe byari bikomeye igihari.

Muri iyi minsi abatuye Isi n’abanyarwanda muri rusange bahagaritswe umutima n’icyorezo cya Coronavirus gikomeje gutwara ubuzima bwa benshi biturutse ku buryo kiri gukwirakwira byihuse.

Inzego bwite za Leta zifatanyije n’abayobozi b’amadini n’amatorero bemeranyije ko amasengesho agomba kujya abera mungo ari nayo mpamvu bamwe mu bayoboye amatorero bakomeje kubwira abayoboke gusengera mu ngo bakomeza kwinginga Imana.

Archbishop Dr Mbanda kuri iki Cyumweru, yatanze ikigisho cyatambutse kuri Television y’u Rwanda, aho yifashishije amabambo aboneka muri Bibiliya mu gitabo cya Zaburi 46:8 yavuze ko “Uwiteka Nyiringabo ari kumwe natwe, Imana ya Yakobo ni igihome kirekire kidukingira.”

Archbishop Dr Mbanda yavuze ko abantu bafite ubuhamya bukomeye bwo gutabarwa n’Imana no kubona ko Imana ikora ni Abanyarwanda.

Ati “U Rwanda rwugarije n’ibitari bike ariko u Rwanda rwaranesheje, rwagize intsinzi nta cyatubuza rero kwizera ko Imana n’ubu yadutabara, ngira ngo twese dushobora kureba aho tuvuye n’aho tugeze.”

Yakomeje agira ati “Ishobora byose, Imana ihoraho, Imana idukunda, Imana y’ubushoboze niyo igira iti ninjye mutabazi wanyu.”

Archbishop Dr Mbanda yifashishije indirimbo abanyarwanda bakunze kuririmba bavuga ko ‘Ndandambara yabatera ubwoba, iyarinze Kagame izabarinda.”

Yagize ati “Nk’uko Imana yarinze u Rwanda muri cyaghihe gikomeye, Ndandambara yadutera ubwoba n’ubu Imana izaturinda, iyatabaye u Rwanda, iyatabaye Abanyarwanda izaturinda, ishobora gukoresha.

Musenyeri Dr Mbanda yavuze ko iyo urebye ingamba zafashwe usanga u Rwanda rwiteguye kandi rwanateguye abarwo.

Yasabye abantu kumenya ko Imana itabara kandi igatabarira mu museke, bivuze ko izira igihe kandi igatabarira igihe.

Archbishop Dr Mbanda yasabye Abanyarwanda aho bari hose kugira icyizere bakibuka kwitwararika, kumvira amabwiriza bahabwa, ibyo bigishwa n’ubuyobozi bityo bakabikurikiza mu rwego rw’ubwirinzi.


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO