Sangiza iyinkuru Inshuti zawe kuri :

Mu masengesho y’abayobozi yo gushima Imana berekanye uko Imana ikunda u Rwanda


Yanditswe na     Ubwanditsi
15 October 2018 saa 07:07'

Perezida w’Inteko Ishinga Amategeko, Umutwe w’Abadepite, Hon Mukabalisa Donatille, avuga ko itorwa rya Min. Mushikiwabo Louise, nk’umunyamabanga Mukuru w’ Umuryango w’Ibihugu Bihuriye ku Rurimi rw’Igifaransa OIF, ari ikigaragaza ko u Rwanda rufite Imana.

JPEG - 98.2 kb
Hon. Mukabalisa Donatille

Ibi yabitangaje mu masengesho yo gushima Imana ku bw’amatora y’Abadepite yagenze neza ndetse no gusengera Inteko Ishinga Amategeko. Ni amasengesho yitabiriwe n’Abagize Inteko Ishinga Amategeko, umutwe w’Abadepite n’abandi bayobozi mu bagize Guverinoma, akaba yaberaga muri Kigali Serena Hotel ku Cyumweru tariki ya 14 Ukwakira 2018.

Hon Mukabalisa wari umushyitsi mukuru muri uyu muhango, yatangaje ko umugisha wa mbere ku gihugu, ari ukugira abayobozi bagikunda ndetse banakunda abayituye.

Yagize ati “Buriya nta mugisha nko kugira abayobozi bakunda igihugu, bakunda Abanyarwanda kandi bahora babashakira ineza buri gihe, nidukomeza kubaka ubumwe bwacu, tukabwubaka bukarushaho gukomera, tukagira urukundo rw’abo dushinzwe, twiyoroshya kuko ari nabyo Imana ishima, tubegera, tubatega amatwi, tukabakemurira ibibazo, Imana yacu, Imana y’i Rwanda ntacyo izatwima”.

Yakomeje avuga ko ari igihe cyo kongera gushima Imana ku bw’intsinzi ya Minisitiri w’Ububanyi n’Amahanga w’u Rwanda, Louise Mushikiwabo, ku wa Gatanu tariki ya 12 Ukwakira 2018, watorewe kuyobora Umuryango w’Ibihugu Bivuga Ururimi rw’Igifaransa, OIF (Organisation internationale de la Francophonie).

Ati “Uyu munsi twari twawugeneye gushima Imana ku bw’amatora y’Abadepite yagenze neza, ariko reka na none dushime Imana ku bwo gutorwa kwa Minisitiri Louise Mushikiwabo watorewe kuba Umunyamabanga Mukuru wa OIF, kubona amahanga yose amugirira icyizere nacyo ni ikintu gikomeye dukwiye gushima Imana, ni ikintu gikomeye cy’uko u Rwanda rufite Imana”

Akomeza avuga ko ari imiyoborere myiza yatumye u Rwanda rwubaka izina ryiza mu ruhando mpuzamahanga, ati “ni ishema rikomeye ku Rwanda na Afurika muri rusange, ariko reka nongereho ko ari n’ishema ku kugira umugore uri forte (ushoboye)”.

OIF Mushikiwabo agiye kuyobora muri manda ya mbere y’imyaka ine, ni umuryango ugizwe n’ibihugu 84 bikoresha ururimi rw’Igifaransa. Ni ibihugu bituwe n’abaturage basaga Miliyoni 90, bagize 14 % by’abatuye Isi. Washinzwe mu 1970, ukaba ufite icyicaro i Paris mu Bufaransa.

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.