Sangiza iyinkuru Inshuti zawe kuri :

Minisante yahaye umukoro Kiliziya Gatolika yamaganye itegeko ryo gukuramo inda


Yanditswe na     Ubwanditsi
25 October 2018 saa 23:37'

Minisiteri y’Ubuzima yasabye Kiliziya Gatolika kurushaho kugaragaza uruhare rwayo mu gukumira ibituma abana baterwa inda.

Inama y’abepisikopi Gatolika mu Rwanda kuri uyu wa Gatatu yashyize hanze itangazo ryamagana itegeko rishya ryo gukuramo inda ndetse isaba amavuriro yayo kutazarikurikiza.

Ingingo ya 123 na 124 z’Igitabo gishya cy’amategeko ahana ibyaha, zivuga ko gukuramo inda cyangwa kugira uwo uyikuriramo ari icyaha.

Icyakora, ingingo ya 125 ivuga ko nta buryozwacyaha bubaho iyo gukuramo inda byakozwe kubera ubisaba utwite ari umwana, kuba inda ibangamiye ubuzima bw’utwite cyangwa ubw’umwana atwite n’ibindi.

Kiliziya ivuga ko gukuramo inda ku bushake ari icyaha gikomeye kandi ko biteye agahinda kuba itegeko ryemera ko bikorwa na muganga ari we wagakwiye kurengera ubuzima bw’umwana n’umubyeyi.

Mu kiganiro n’abanyamakuru kuri uyu wa Kane, Minisitiri w’Ubuzima, Dr Diane Gashumba, yavuze ko iryo tegeko ryagiyeho ngo risigasire ubuzima.

Ati “Nta gishya cyaje muri riya tegeko kuko impamvu zo gukuramo inda zari ziri mu mategeko yacu ntabwo zahindutse. Impamvu iri tegeko ryagiyeho, ni ugusigasira ubuzima bw’abanyarwanda, kurinda ubuzima bw’uwo mubyeyi wari ugiye guhitanwa n’iyo nda cyangwa wa mwana wasamye inda atarageza igihe.”

Itegeko rivuga ko ushaka gukurirwamo inda abisaba bigasuzumwa.

Kiliziya yo isanga nta muntu ukwiye kugira ububasha bwo kuvutsa undi ubuzima, kabone n’iyo bwaba ari ubw’urusoro rukiri mu nda.

Gashumba yavuze ko Kiliziya Gatolika ari uburenganzira bwayo kutabyemera, gusa ayisaba kurushaho kugaragara mu bikorwa bikumira ibituma abantu baterwa inda bakifuza ko zivamo.

Ati “Abandi bafite uburenganzira bwo kutabyemera ariko abaturage bacu iyo tubigishije barumva. Ikindi abo bose bavuga ko batabyemera, bagaragaze uruhare mu kwirinda bya bibazo. Bagaragaze uruhare mu kwirinda amakimbirane atuma abana bafatwa ku ngufu n’ihohotera ryiyongera.”

Kiliziya Gatolika ifite ibigo nderabuzima n’ibitaro bisaga 118 mu gihugu hose. Si bwa mbere ifata umwanzuro ukomeye nk’uyu kuko mu 2016 yahagaritse mu mavuriro yayo serivisi zitari iza gakondo mu kuboneza urubyaro. Minisitiri Gashumba yasabye Kiliziya Gatolika kongera imbaraga mu guhashya impamvu zatuma abana baterwa inda

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.