Dukurikire kumbuga Nkoranyambaga


Advertisement Banner

Korali Bethlehem yahurije hamwe abaramyi bakunzwe mu giterane cya ‘Bethlehem Evangelical Week 2019’

Ubwanditsi , 1 month ago

Korali Bethlehem ikorera umurimo w’Imana mu Itorero rya ADEPR Paruwasi ya Gisenyi yateguye igiterane cy’icyumweru cyiswe ‘Bethlehem Evangelical Week 2019’ yahurijemo abahanzi n’amakorali akunzwe mu Rwanda kizanaberamo ibikorwa by’urukundo byo gufasha abatishoboye.

Icyumweru cyahariwe ivugabutumwa gitegurwa na Korali Bethlehem, kuri iyi nshuro cyahawe intego ivuga ngo “Naho twebweho iwacu ni mu ijuru’’ iboneka mu Abafilipi 3.20.

Biteganyijwe ko iri vugabutumwa rizatangira ku wa Mbere, tariki ya 9 Ukuboza risozwe ku wa 15 Ukuboza 2019, aho rizabera kuri ADEPR Paruwasi ya Gisenyi.
Abazitabira iki giterane bazifatanya n’abahanzi barimo Alexis Dusabe, Danny Mutabazi na Innocent Tuyisenge uri mu bari kuzamuka mu muziki uhimbaza Imana akaba asanzwe aririmba muri Korali Shalom yo muri ADEPR Nyarugenge.

Aba baziyongeraho korali zirimo Siloam ya ADEPR Kumukenke mu Mujyi wa Kigali n’izindi z’i Rubavu nka Bethel, Impuhwe, Rehoboth, Siyoni, La Source, Bethfage na Penuel.
Iki giterane kizahuriza hamwe abaramyi bakunzwe

Ijambo ry’Imana rizabwiriza n’abavugabutumwa babisigiwe barimo Ev. Singirankabo Boniface, Pasiteri Habyarimana Désiré na Rev. Past Butera Célestin.
Umuyobozi wa Korali Bethlehem, Muhire Innocent, yatangarije IGIHE ko iki cyumweru cyateguwemo ibikorwa byinshi by’ivugabutumwa rinyuze mu ndirimbo no kuremera abatishoboye.
Yagize ati “Hari ibikorwa tuzakora byo gufasha abantu mu bitaro, muri gereza n’ahandi nkuko dusanzwe tubigenza.’’
Yavuze ko kuri iyi nshuro bazanita ku bo mu rusengero bahereye ku bo bakorana umurimo w’ivugabutumwa rinyuze mu ndirimbo.

Ati “Turifuza kuzaremera n’abantu bo muri twe batishoboye. Mu myaka ibiri ishize, ivugabutumwa ryacu ryibanze cyane mu byaro tugera ku bantu batagiraga amahirwe yo gutaramana natwe. Turashaka gukomeza kwagura ivugabutumwa mu bice bitandukanye by’igihugu.’’

Ibiterane bizaba muri iki cyumweru biteganyijwe ko kuva ku wa Mbere kugera ku wa Gatanu bizajya biba saa 16:00-20:00. Ku wa Gatandatu ni saa 14:00-20:00 mu gihe kizasozwa ku wa 15 Ukuboza 2019 mu gitaramo gikomeye giteganyijwe kuva saa 9:00-18:30.

Mu mwaka ushize ibikorwa byakozwe muri Bethlehem Evangelical Week byari bifite agaciro k’arenga miliyoni enye n’igice z’amafaranga y’u Rwanda.

Korali Bethlehem yatangiye umurimo w’Imana mu 1965, igizwe n’abaririmbyi bane, yari iy’Urubyiruko. Nyuma y’imyaka ibiri yahawe izina rya Bethlehem. Ni korali ya kabiri yashinzwe muri ADEPR nyuma ya Bethania y’i Gihundwe aho iri torero ryatangirijwe mu 1940.

Korali Bethlehem ubu ibarizwamo abarenga 80. Yibarutse abashumba benshi bagiye bahabwa imirimo itandukanye mu nzego zo hejuru muri ADEPR.

Iyi korali imaze kubaka ibigwi mu bakunda umuziki uramya Imana, ifite album esheshatu z’indirimbo z’amajwi n’izindi z’amashusho. Yakoze ivugabutumwa mu nsengero n’ibiterane byagutse, muri za gereza mu Rwanda, yanatumiwe mu bitaramo mu bihugu birimo u Burundi, Repubulika Iharanira Demokarasi ya Congo, Tanzania, Uganda na Kenya.


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO