Sangiza iyinkuru Inshuti zawe kuri :

Ingoma Entertainment Group bambariye gufatanya na Police kurwanya ibiyobyabwenge mu Urubyiruko binyuze muri Muzika ihimbaza Imana


Yanditswe na     Ubwanditsi
23 October 2018 saa 06:06'

Ku cyumweru cyo kw’itariki 21 Ukwakira 2018 ku Gisozi kuri Dove Hotel habereye igitaramo cyo kuramya no guhimbaza Imana cyahurije hamwe abaririmbyi bakomeye n’amakorali amaze kubaka izina mu kuramya no guhimbaza Imana, cyabimburiye ibindi 12 bizabera mu mpande zose z’igihugu binatangirwamo ubutumwa bwo kwamagana ibiyobyabwenge mu rubyiruko.

Iki gitaramo cyabaye kuri iki Cyumweru cyitabiriwe n’imbaga y’abantu biganjemo urubyiruko, basusurukijwe na Korali Injiri Bora, Power of the cross, Bosco Nshuti umaze kwigarurira imitima ya benshi, Pappy Claver, Danny Mutabazi n’abandi bahanzi banyuranye.

Iki gitaramo cyabimburiye ibindi 12 bizaba mu minsi iri imbere, cyahembuye imitima y’abacyitabiriye, binyuze mu ndirimbo zikunzwe abahanzi baririmbye.

Hatangiwemo ubutumwa bunyuranye bwatanzwe n’abavugabutumwa ndetse n’inzego zinyuranye za Leta, zirimo Minisiteri y’urubyiruko,urwego rwa polisi ndetse n’uryango uharanira uburenganzira bwa muntu (CLADHO), Umujyi wa Kigali aho abafashe ijambo bagarukaga no ku ngaruka mbi z’ibiyobyabwenge ku rubyiruko.

Iki gitaramo cyitabiriwe kandi n’itsinda ryaturutse muri RPHIA. Iyi RPHIA ni amagambo ahinnye y’icyongereza asobanura ubushakashatsi ku baturage buzakorerwa mu ngo bugamijwe kureba ibyagezweho na gahunda zo kurwanya virus itera SIDA mu Rwanda.

Senior Supt Vita Amza wari uhagarariye urwego rwa Polisi muri iki gitaramo, yashimye uruhare rwa Ingoma Entertainment Group ndetse n’abahanzi bagize mu gutekereza kuri gahunda yo kurwanya ibiyobyabwenge mu rubyiruko.

Ntaganira Theogene Umuyobozi wa Ingoma Entertainment Group yateguye ibi bitaramo yabwiye IYOBOKAMANA.COM ko igitaramo bakoze ari icyo ikibimburira ibindi bazakorera mu mpande zose z’igihugu, byitezwemo guhindura no kubatura urubyiruko rwabaswe n’ibiyobyabwenge binyuze mu butumwa bwiza.

Yavuze ko igitaramo cyakozwe cyo gutangiza ku mugaragaro gahunda yo kurwanya ibiyobyabwenge mu rubyiriko, cyagenze neza ndetse ko n’ubwitabire bwahagaragaye bwatanze icyizere ku biri imbere.

Yagize ati "Intego yacu twari dufite yagezweho ijana ku ijana. Hari abantu benshi kandi biganjemo urubyiruko, abahanzi baririmbye neza, abantu barishima.

Turateganya ko mu mpera z’ukwa 11 cyangwa mu ntangiriro z’ukwa 12 uyu mwaka tuzakora ikindi gitaramo."

Ntaganira Theogene yavuze ko mu bitaramo biri imbere bateganya kuzakoresha abahanzi baririmba indirimbo zisanzwe (Secular) ariko bafite nke zihimbaza Imana kugira ngo bazakurure ba bandi batisanga cyane ku bahanzi ba Gospel.

Yagize ati “Muri gahunda dufite ni uko tuzakoreshamo abahanzi batari abo muri Gospel.Tuzi neza ko urubyiruko dukeneye rudakururwa cyane n’abahanzi bo muri Gospel ahubwo rukururwa n’abahanzi b’indirimbo zisanzwe, ariko tubasabe kuririmba indirimbo zo guhimbaza imana.

Ni ukuvuga ko tuzatumira abafite izo guhimbaza Imana, nka ba King James, Jules Sentore, Mani Martin hanyuma rwa rubyiruko ruze rubakurikiye.” Yavuze ko bateganya ko iyio gahunda izasozwa mu kwezi kwa 11 k’umwaka utaha.


Injiri Bora yataramiye abitabiriye igtaramo cyabimburiye ibindi bataha banyuzwe


Itsinda Power of cross rikunzwe cyane mu ndirimbo Super power




Papy Claver na Bosco Nshuti,Dany Mutabazi n’abandi basusurukije abantu mu ndirimbo zisana imitima ya benshi

CIP Emmanuel Kayigi Umuvugizi wa Polisi muri Kigali ari kumwe na SSP Vita Amza bakurikiye ubutumwa bwiza bwatangwaga mu ndirimbo

SSP Vita Amza yatanze ubutumwa ku ngaruka z’ibiyobyabwenge ku rubyiruko


Iki gitaramo cyitabiriwe n’abantu benshi biganjemo urubyiruko



Itsinda riri gukora ubushakashatsi kuri SIDA naryo ryitabiriye iki gitaramo



Moise avuga ijambo mw’izina rya Ingoma Entertainment Group

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.