Dukurikire kumbuga Nkoranyambaga


Advertisement Banner

Hamaze gukusanywa miliyoni amagana zo gusana Cathédrale Notre-Dame de Paris yangijwe n’inkongi y’umuriro

Ubwanditsi , 16 April

Perezida w’u Bufaransa Emmanuel Macron yasezeranyije ko Notre Dame de Paris izasanzwa nyuma y’inkongi yayibasiye ikangiza igice kinini cyayo cyo hejuru.

Iyi kiliziya imaze imyaka isaga 800 iherereye mu mutima w’umurwa mukuru w’u Bufaransa. Yafashwe n’inkongi ikaze ku mugoroba wo kuri uyu wa Mbere, yangiza igisenge cyose ndetse n’ibindi bice bitandukanye byayo.

Cathédrale Notre Dame de Paris ibitse ibimenyetso byinshi by’amateka birimo ikamba ry’amahwa bivugwa ko ari iry’umwimerere Yezu yambitswe ku musaraba, umusumari yabambishijwe, ikanzu ya Louis IX umwami rukumbi w’u Bufaransa wagizwe umutagatifu n’ibindi.

Nyuma yo kuzimya iyo nkongi, kuri uyu wa Kabiri hatangijwe ubukangurambaga bugamije gukusanya amafaranga yo gusana iyi nyubako.

Meya w’Umujyi wa Paris, Anne Hidalgo yatangaje ko uwo mujyi uzatanga miliyoni 50 z’amayero kugira ngo Notre Dame de Paris isanwe.

Abaherwe bakomeye mu Bufaransa nabo batangiye kwitanga uko bafite ngo iyo nyubako isanwe. Umuherwe Francois Henri Pinault yatanze miliyoni ijana z’amayero mu gihe nyiri sosiyete LVMH ikora iby’imirimbo, Bernard Arnault yemeye gutanga miliyoni 200 z’amayero nkuko RFI yabitangaje.

Ishami ry’umuryango w’abibumbye rishinzwe ubumenyi n’umuco (UNESCO) naryo ryemeye ko rizatanga umusanzu mu isanwa ry’iyo Kiliziya.

Perezida Macron yatangaje ko hagiye kujyaho itsinda rigomba kwiga isanwa ry’iyo nyubako ifatwa nk’ibitse umurage w’Abafaransa.

Iyi Kiliziya yatangiye kubakwa mu mwaka wa 1163, imirimo yo kuyubaka irangira mu mwaka wa 1345 itwaye imyaka 182. Ni inyubako ibitse amateka menshi y’imyaka hafi igihumbi y’umujyi wa Paris n’u Bufaransa muri rusange kuko niho umwami w’abami Napoleon Bonaparte yimikiwe.

Iyi nyubako isurwa cyane kurenza izindi mu Burayi bwose kuko imibare igaragaza ko nibura isurwa na ba mukerarugendo miliyoni 13 buri mwaka. Ifite umunara ureshya na metero 69 n’inzogera ziremereye 13 zose zitwa Emmanuel.


Abaherwe n’inzego zitandukanye bakomeje gukusanya inkunga yo gusana Notre-Dame de Paris








ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO