Dukurikire kumbuga Nkoranyambaga


Advertisement Banner

Bugesera :Bombori bombori muri ADEPR bapfa amafaranga

Ubwanditsi , 15 February

Muri ADEPR zabyaye amahari aho Umushumba w’Itorero ry’Akarere ka Bugesera, Rev. Rwigema Donatien n’uwa Paruwasi ya Nyamata, Rev. Baganineza Emile, bashyizwe mu majwi ku ruhare mu inyerezwa ry’amafaranga yagenewe umushinga wa Kompasiyo ya Kayenzi.

Amakuru y’amafaranga bivugwa ko yanyerejwe yatangiye gusakara muri Mutarama 2019, ubwo Rev. Rwigema na Rev. Baganineza bandikiye Umucungamari wa Kompasiyo ya Kayenzi mu Bugesera, Nyirambagare Julie, bamusaba ibisobanuro ku makosa yakoze mu kazi.

Nyirambagare mu gusubiza ibaruwa yagaragaje ko mbere na mbere isobanya amatariki kuko yayandikiwe ku wa 19 Mutarama 2019, nyamara igaragaza ko amakosa yayakoze ku wa 04-05/02/2019. Ikindi iyi baruwa yayibonye ku wa 07/02/2019.

Iyi baruwa ya Nyirambagare IGIHE ifitiye kopi, yakiriwe na ADEPR Nyamata ku wa 10 Gashyantare 2019, ibiyikubiyemo byamenyeshejwe Biro Nyobozi ya ADEPR, Umushumba w’Ururembo rwa ADEPR mu Burasirazuba n’Umwungirije.

Avugamo ko amakosa ashinjwa ko yakoze ari ibinyoma, agahishura ko ari akagambane kagamije gusibanganya ibimenyetso by’amafaranga Rev. Rwigema na Rev. Baganineza, banyereje.

Yagize ati “Ayo makosa mundega ntayo nakoze ahubwo ni akagambane nkomeje gukorerwa nyuma yaho mugaragaweho imicungire mibi y’umutungo w’umushinga ufashwa na kompasiyo kandi mfitiye ibimenyetso [inyerezwa ry’amafaranga].’’

Yasabye Umuyobozi w’Itorero ry’Akarere ka Bugesera n’uwa Paruwasi ya Nyamata gukurikiza inama bahawe na Biro ya ADEPR na Compassion International kuko “Ntakwiye kuzira ukuri nagaragaje.’’

Iyi kompasiyo mu minsi yashize yari yasuwe n’ubuyobozi bw’uyu muryango n’ubwa ADEPR buyigira inama z’uburyo yanoza imikorere.

Umucungamari yasabiwe gushyirwa hanze y’itorero, umushumba we aratsemba

Nyirambagare Julie ushinzwe Imari muri Kompasiyo ya Kayenzi ibarizwamo abana barenga 300 ni umukirisitu wa ADEPR Ntarama mu Bugesera.

Nyuma yo kugirana ibibazo na Rev. Rwigema Donatien uyobora Itorero ry’Akarere, yamusabiye gutengwa kuko ‘yamusuzuguye’.

Pasiteri Nteziryayo Vianney uyobora Paruwasi ya Ntarama, yatangarije IGIHE ko atarenganya intama ngo ni uko yagiranye ibibazo n’abantu bo mu yindi paruwasi.

Yagize ati “Yambwiye (Rev. Rwigema) ko kuba umucungamari yaravuze ko banyereje amafaranga ubwo yarabatutse, nitumuhagarike mu itorero. Sinamwemereye, kuvuga ngo uhagarike umuntu ngo kuko hari ibyo agushinja kandi igenzura (audit) ritarakorwa ntibyumvikana.’’

Pasiteri Nteziryayo yavuze ko inzego zibishinzwe zizagenzura ukuri kwabyo.

Ati “Niba yaragiranye ibibazo na bo, inzego zibishinzwe zizabisuzume. Ni ibyo mu kazi ko mu yindi paruwasi ariko ntibyinjira mu yo nyobora. Ntabwo umuyobozi ukuyobora yagukoresha amakosa yose ngo umwemerere.’’

Yakomeje ati “Twe duhagaze mu bukirisitu ntidushobora kumwirukana. Igenzura nirigaragaza ko yabeshye na we bizamugiraho ingaruka.’’

Uretse ibyatangajwe n’Umucungamari Nyirambagare aca amarenga ko amafaranga yanyerejwe, ingano yayo itaramenyekana.

Amakuru IGIHE ifite ni uko ADEPR yitegura gukora ubugenzuzi kuri iki kibazo ngo icukumbure ishingiro ryacyo.

Igihe dukesha iyi nkuru bavugako bagerageje kuvugana n’ubuyobozi bukuru bwa ADEPR ariko Umuvugizi wayo, Rev. Karuranga Ephreum na Rev. Karangwa John, Umwungirije ntibitabye telefoni zabo zigendanwa.

Si ubwa mbere havuzwe ibibazo mu micungire y’umutungo wa kompasiyo mu Bugesera. Mu ntangiriro za 2018, Itorero Nazareen riri mu Murenge wa Nyarugenge mu Bugesera, ryavuzwemo gukandamiza abagenerwabikorwa bayo bakwa amafaranga yo kwinjiramo, gutegekwa gutanga 1/10 ku nkunga bahabwa n’ibindi.

Compassion International yatangiye gukorera mu Rwanda mu 1980. Ifasha abana batishoboye bo mu matorero atandukanye, aho inabarihira kuva mu mashuri abanza, ayisumbuye na kaminuza.


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO