Sangiza iyinkuru Inshuti zawe kuri :

Ruswa, ubusambanyi bimwe mu byaha bishyize iherezo ku butegetsi bwa Zuma


Yanditswe na     Ubwanditsi
15 February 2018 saa 04:46'

Ku wa 14 Gashyantare 2018, nibwo Zuma yavuye ku izima arekura ubutegetsi, nyuma y’amasaha make avuze ko abona nta mpamvu n’imwe yatuma yegura igitaraganya. Ruswa n’ubusambanyi ku isonga ry’ibyaha bimutembagaje.

Mu ijambo ryaciye kuri Televiziyo y’Igihugu, Zuma waburaga amezi 18 ngo arangize manda ye ya kabiri, yavuze ko nta buzima buzatakara kubera izina rye cyangwa ngo ANC icikemo ibice, ndetse yemeza ko azakomeza gukorera igihugu.

Ati “ Nubwo ngiye, nzakomeza gukorera abaturage ba Afurika y’Epfo hamwe na ANC, umuryango nakoreye ntizigama ubuzima bwanjye bwose.”

Ubuzima bw’uyu mugabo w’imyaka 75 uri mu barwanyije politiki y’ivangura muri Afurika y’Epfo, bwaranzwe n’ibikorwa bitavuzweho rumwe, bimwe muri byo bikaba biri mu byatumye abaturage batangira gusaba ko yegura.

-  Ibyaha bisaga 780 bifitanye isano na ruswa
Zuma watangiye kuyobora Afurika y’Epfo mu 2009, acyekwaho ibyaha bigera kuri 783 bifitanye isano na ruswa, birimo n’ibyatumye asabwa kwegura.

Ibi byaha acyekwaho kuba yabikoze mu myaka ya 1990, ubwo hatangwaga isoko ryo kugura intwaro zifite agaciro ka miliyari 30 z’ama-rand (asaga miliyari 2000 z’Amanyarwanda). Icyo gihe yari Visi Perezida wa Afurika y’Epfo.

-  Yasambanyije umugore urwaye Sida
Mu 2005 ubwo yari Visi Perezida w’ishyaka rya ANC, Zuma yashinjwe gufata ku ngufu umugore wari ufite ubwandu bw’agakoko gatera Sida witwaga Fezekile "Khwezi" Kuzwayo. Yari umukobwa w’inshuti ye bafunganywe mu gihe cya politiki ya apartheid.

Nubwo mu 2006 urukiko rwanzuye ko Zuma ari umwere, benshi bamuhaye inkwenene ubwo yavugaga ko nyuma yo kuryamana na Khwezi byakozwe ku bwumvikane, yahise ajya kwiyuhagire kugira ngo agabanye ibyago byo kwandura Sida.

-  Yakoresheje umutungo wa leta avugurura inzu ye bwite
Nyuma y’iminsi mike abaye Perezida, byaje kumenyekana ko Zuma yakoresheje umutungo wa leta mu kuvugurura inzu ye iherereye ahitwa Nkandla, aho yongeyemo ubwogero bugezweho (piscine).

Ibyakozwe na Zuma byaje kwamaganwa n’Inteko Ishinga Amategeko, maze ategekwa kwishyura amafaranga asaga ibihumbi 500 by’amadolari.

-  Yabyaranye n’umukobwa w’inshuti ye Irvin Khoza

Mu 2010, Zuma yasabye imbabazi abaturage ba Afurika y’Epfo,nyuma yo kubyara umwana ku mugore utari uw’isezerano. Uwo babyaranye ni Sonono Khoza, umukobwa w’inshuti ye Irvin Khoza.

Zuma usanzwe azwiho kugira abagore benshi yabyaranye na Khoza kandi yari yarasezeranyije ANC ko nyuma y’ibyabaye hagati ye na Khwezi, atazongera kuryamana n’umugore utari uw’isezerano.

-  Yirukanye Minisitiri w’Imari bihungabanya ubukungu
Mu Ukuboza 2015, Zuma yirukanye Nhlanhla Nene wari Minisitiri w’Imari wa Afurika y’Epfo, amusimbuza Des van Rooyen wakoraga mu Nteko Ishinga Amategeko.

Nyuma yo gushyiraho Rooyen ariko ubukungu bw’iki gihugu kiri mu byateye imbere cyane ku mugabane wa Afurika bwarahungabanye ndetse ifaranga rita agaciro ku buryo bugaragara.

Kugwa ku ifaranga byatumye nyuma y’iminsi ine gusa, Rooyen asimbuzwa Pravin Gordhan wari warigeze kuyobora iyi minisiteri. Uyu nawe ariko umwaka ushize yarirukanywe aho bivugwa ko uyu mwanzuro wafashwe hagendeye ku cyifuzo cy’umuryango w’abahinde witwa Gupta, uzwiho gutanga ruswa ugamije kugira uruhare mu byemezo bifatwa na guverinoma.

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.