Sangiza iyinkuru Inshuti zawe kuri :

Abanyamadini bitabaje abaterankunga ngo buzuze ibyangombwa by’insengero zabo zafunzwe


Yanditswe na     Ubwanditsi
21 June 2018 saa 07:38'

Abanyamdini batandukanye mu Rwanda bari gushakisha inkunga kugira ngo buzuze ibyo basabwe ku nsengero cyangwa imisigiti yafunzwe, ngo barebe ko byakongera gufungurwa.

Muri Gashyantare uyu mwaka nibwo zimwe mu nsengero zitari zujuje ibisabwa zatangiye gufungwa haba mu Mujyi wa Kigali no hirya no hino mu gihugu.

Mu igenzura rito IGIHE yakoze muri Werurwe, yasanze mu Rwanda hose insengero zari zimaze gufungwa zirenga 6300 kubera kutuzuza ubuziranenge mu myubakire, isuku n’ibindi.

Nubwo zimwe mu nsengero zagiye zuzuza ibyo zasabwe zigafungurwa, hari izigifunze kuko zitarabasha kubyuzuza.

Abanyamadini bavuga ko ubusanzwe ibikorwa byabo bikorwa hifashishijwe impano, ibyacumi n’amaturo bituruka mu bayoboke bayo. Gufungirwa zimwe mu nsengero ngo byabaye imbogamizi ku kubona andi mafaranga yo gukora ibyo basabwe ngo insengero zifungurwe.

Umujyanama wa Mufti w’u Rwanda, Sheikh Mbarushimana Suleiman, yavuze ko nibura bari bakeneye miliyoni 53 Frw kugira ngo batunganye ibyo basabwe mu misigiti 49 igifunze.

Gusa ngo ibikorwa byo gushakisha inkunga batangije bimaze gutuma hafungurwa imisigiti 52 nyuma yo kubona miliyoni 47 Frw.

Ubuyobozi bw’Itorero ry’Abangilikani mu Rwanda bwatangarije Rwanda Today dukesha iyi nkuru ko hakenewe miliyoni zisaga 200 Frw kugira ngo insengero zigera ku ijana zigifunze.

Kubera ko 95 % by’amafaranga Itorero ry’Abangilikani mu Rwanda rikoresha aturuka mu bayoboke baryo, gufunga insengero ngo byagize ingaruka no ku bindi bikorwa birimo gahunda z’uburezi n’imibereho myiza.

Umuyobozi w’Itorero ry’Abangilikani mu Rwanda, Musenyeri Dr Laurent Mbanda, yavuze ko bakomanze henshi basaba inkunga ariko ntacyo barabona.

Yagize ati “Abayoboke baritanze bongera ku nkunga za diyosezi kuko nibura buri rusengero rwafunzwe rukeneye miliyoni ebyiri ariko kubera ko diyosezi zibeshwaho n’amafaranga avuye muri paruwasi kandi inyinshi zikaba zarafunzwe, n’izindi gahunda nk’amashuri y’incuke byakorerwaga kuri izi nsengero byagizweho ingaruka.”

Insengero zisaga 204 z’abangilikani zarafunzwe mu gihugu hose, bigira ingaruka ku mashuri y’incuke 196 yakoreraga aho ndetse bigira ingaruka no kuri gahunda zijyanye n’imirire myiza zahatangirwaga.

Iki kinyamakuru cyatangaje ko hari n’andi madini yari afite gahunda nini zigamije kwita ku mibereho myiza y’abaturage nk’uburezi n’ubuzima yagabanyije ibyo yashyiragamo kugira ngo abanze yite ku bikenewe kugira ngo insengero zafunzwe zifungurwe.

Urwego rw’igihugu rushinzwe imiyoborere rwatangaje ko hari isuzuma rizakorwa mu byumweru bike biri imbere harebwa uko ikibazo cy’insengero zari zarafunzwe gihagaze.

Iryo suzuma niryo rizagaragaza insengero zakoze ibyo zasabwaga zikaba zarafunguwe cyangwa zitegereje gufungurwa ndetse n’izizafungwa burundu.

Insengero nyinshi zafunzwe ni izidafite ubwiherero cyangwa n’izibufite bukaba ari buke cyane, izitagira amazi, iziganwa n’abantu batunze imodoka ntibabone aho bazishyira, izidafite ibitangira urusaku, izubakishije amahema n’ibindi.

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.