Dukurikire kumbuga Nkoranyambaga


Advertisement Banner

Kizito Mihigo yashyize hanze indirimbo “Vive le Pardon” yogeza imbabazi

Ubwanditsi , 4 months ago

Umunyamuziki uri mu bafite inganzo yagutse mu Rwanda, Kizito Mihigo, yashyize ahagaragara indirimbo ye nshya yise “Vive le Pardon” yogeza imbabazi.

Iyi ndirimbo ni isezerano yasohoreye abakunzi b’ibihangano bye yari yijeje kugezaho indirimbo yanditse mu Gifaransa izajyana n’Umunsi Mpuzamahanga w’abavuga uru rurimi wizihijwe kuri uyu wa 20 Werurwe 2019.

“Vive le Pardon” bishatse kuvuga mu Kinyarwanda ngo “Harakabaho imbabazi”, ni indirimbo yasohokanye n’amashusho yayo.

Yifitemo ubutumwa buva imuzi ubwiza bw’imbabazi agereranya n’imbaraga zituruka ku Mana zigatuma abantu bagira amahoro mu mitima, mu miryango, igihugu n’Isi yose.

Uyu muhanzi ari mu Banyarwanda bake baririmba indirimbo ziri mu Gifaransa. Yaherukaga guhimba iyitwa ‘‘Mon frère Congolais’’, ‘‘Arc en ciel’’ na ‘‘Miséricorde’’ yasohoye mbere yo gufungwa.

Mu gitero cya mbere, Kizito yungikanyije amagambo agira ati “Imbabazi ni igihamya cy’urukundo, imbabazi, za mbaraga zituruka mu ijuru, ziduha ubushobozi n’ubushishozi, zikaduha ubwisanzure n’umunezero, zigahinduka inzira igana amahoro.”

Inyikirizo ya “Vive le Pardon”igira iti “Kubabarira si ukwibagirwa amateka yacu, kubabarira ni ukurenga kamere yacu, ni ugukunda muntu uko ari, kandi tuzi neza ko ari umunyantege nke n’umunyabyaha. Harakabaho imbabazi mu mitima yacu no mu gihugu cyacu, muri Afurika no ku Isi yose, harakabaho imbabazi.”

Iyi ndirimbo y’iminota ine n’amasegonda 59, amajwi yayo yatunganyijwe na Producer Pastor P mu nzu ya “Urban Records”, naho amashusho akorwaho na Producer Faith Fefe.

Igitero cyayo cya kabiri kivuga ko “Imbabazi ntizirwanya ukuri ahubwo ziragukenera. Iyo urukundo rushakanye n’ubutabera, havuka amahoro, maze n’ubwiyunge bugashoboka.”

Indirimbo isozwa mu gice gishimangira ko imbabazi ari umuti ndetse zikaba impumuro nziza mu bantu.

INDIRIMBO YIREBE HANO:


ANDIKA IGITEKEREZO CYAWE

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

ISHAKIRO